Давлат Думасига меҳнат муҳожирлари учун мажбурий тиббий суғурта ва таҳлиллардан ўтишни назарда тутадиган қонун лойиҳаси киритилади.

14 июль куни Россияга келаётган меҳнат муҳожирлари учун талабларни қатъийлаштирадиган қонун лойиҳаси Давлат Думага киритилади. Ушбу ташаббус билан Меҳнат ва ижтимоий сиёсат қўмитаси раиси Ярослав Нилов бошчилигидаги депутатлар гуруҳи чиқмоқда. Бу ҳақда xabar bermoqda rtvi.com.

Қонун лойиҳасига мувофиқ, меҳнат муҳожирлари Россияга киришда қуйидаги ҳужжатларга эга бўлишлари шарт:

1. Тиббий суғурта полиси;
2. ВИЧ-инфекция, В ва С гепатити, сифилис ҳамда сил касалликлари йўқлигини тасдиқловчи таҳлил натижалари (таҳлиллар муддати – Россияга кириш кунигача бўлган 10 кундан ошмаслиги керак);
3. Наркотик ва психотроп моддалар йўқлигини тасдиқловчи тест натижалари (тест муддати – Россияга кириш кунигача бўлган 72 соатдан ошмаслиги керак).

Ниловнинг сўзларига кўра, ушбу ҳужжатлардан камида биттаси мавжуд бўлмаса, бу Россияга кириш учун рад этишга асос бўлади.

Депутатнинг таъкидлашича, қонун лойиҳасини қабул қилиш зарурлиги шундаки, муҳожирларга кўрсатиладиган шошилинч тиббий ёрдам Россия бюджетига миллиардлаб харажатларни юкламоқда. Шунингдек, етарли ижтимоий капиталига эга бўлмаган хорижий фуқаролар Россияга келган заҳоти турли ижтимоий нафақаларни олишни бошламоқда.

Нилов шуни ҳам қайд этдики, дунёдаги кўплаб давлатларда тиббий суғуртанинг мавжудлиги мамлакатга кириш учун мажбурий шарт ҳисобланади. У нега бундай талаб Россияга келаётган муҳожирларга қўйилмаётганига ҳайрон эканини билдирди. У тиббий назоратнинг йўқлиги ижтимоий хавфли касалликларнинг тарқалиши ва мамлакатда гиёҳвандликка мойил шахслар сонининг ортишига олиб келиши мумкинлигини таъкидлади.

Эслатиб ўтамиз, сўнгги вақтларда Давлат Думага миграцияни қатъий назорат қилишни кучайтиришга қаратилган қонун лойиҳалари мунтазам киритиб келинмоқда.