Davlat Dumasi Mehnat qo‘mitasi raisi Yaroslav Nilov muhojirlarning Rossiyaga kirishi uchun majburiy shart sifatida tibbiy sug‘urta polisi va bir qator kasalliklardan holi ekanligini tasdiqlovchi ma’lumotnoma taqdim etishni taklif qildi. Bu haqda xabar bermoqda «ТАСС».
Deputatning ta’kidlashicha, hozir muhojirlar mehnat patenti olish uchun tibbiy ko‘rikdan faqat Rossiyaga kirgandan keyin o‘tadi, bu esa ma’lum xavflarni yuzaga keltiradi. Unga ko‘ra, “mamlakatimiz xavfsizligi manfaatlari uchun” muhojirlar quyidagi kasalliklar yo‘qligini tasdiqlovchi hujjatlarga ega bo‘lishlari shart:
- OIV, gepatit B va S, sifilis hamda sil (kirishdan kamida 10 kun oldin o‘tkazilgan tahlillar asosida);
- Giyohvandlik va psixotrop moddalar mavjud emasligi (kirishdan kamida 72 soat oldin o‘tkazilgan test asosida).
Nilov shuningdek, qat’iy talabni ilgari surdi: “Chegarada sug‘urta polisi yo‘q — demak, kira olmaysan”. U tushuntirishicha, hozir Rossiya sog‘liqni saqlash tizimi sug‘urtasi bo‘lmagan muhojirlarga (tug‘ruq, appenditsit va hokazo holatlarda) shoshilinch tibbiy yordam ko‘rsatmoqda, bu esa mintaqaviy byudjetlarga yuk bo‘lmoqda. Polisni onlayn tarzda sotib olish mumkin bo‘ladi.
Shu mazmundagi qonun loyihasi allaqachon Davlat Dumasiga kiritilgan.
