Буюк Британия 23 июлдан бошлаб дунёда биринчи марта ноқонуний миграцияни ташкилловчиларга қарши йўналтирилган санкциялар режимини жорий этмоқда. Мамлакат ташқи ишлар вазири Дэвид Лэммининг таъкидлашича, бу санкциялар активларни музлатиш ва қиролликка киришни тақиқлашни ўз ичига олади. Бу ҳақда xabar bermoqda РИА Новости.
Вазир Дэвид Лэммининг таъкидлашича, санкциялар жиноий гуруҳларга қарши курашиш ва Буюк Британия чегаралари хавфсизлигини таъминлаш воситасидир. Унинг баёнотига кўра, инсонларни ноқонуний равишда мамлакатга олиб киришда иштирок этганлар, шунингдек, ноқонуний миграцияга кўмаклашган барча шахслар қатъий чораларга дуч келади — уларнинг активлари музлатилади, Британия молиявий тизимидан узилади ва мамлакатга кириш тақиқланади.
Қўлланилаётган чора-тадбирлар ноқонуний миграция ташкилотчилари ва уларга ёрдам берувчиларга нисбатан санкцион босимнинг фақат биринчи босқичи бўлади. Бу чоралар қайиқ етказиб берувчиларни, сохта ҳужжатлар тайёрловчиларни ва молиявий операцияларни амалга оширадиган воситачиларни ҳам қамраб олади.
Буюк Британияда Ла-Манш бўғозидан мигрантлар томонидан ўтиш билан боғлиқ инқироз 2018 йилдан бери давом этмоқда. 2025 йил бошидан бери 20 мингдан ортиқ ноқонуний мигрант бўғоз орқали мамлакат соҳилларига етиб келган. Жорий йилнинг биринчи олти ойида қиролликка келган ноқонуний мигрантлар сони ўтган йиллардаги рекордларни янгилади. “Reform UK” партияси раҳбари Найджел Фараж бундан олдин ноқонуний мигрантлар оқими туфайли фавқулодда ҳолат жорий этишга чақирган эди.
