Krasnoyarsk viloyati prokuraturasi Norilsk shahrida ishlash uchun O‘zbekistondan kelgan uch nafar muhojirni noqonuniy olib kirish va legallashtirish sxemasini fosh etdi. Ushbu hududda muhojirlar faoliyat yuritishi uchun FSBning maxsus ruxsati talab qilinadi. Bu haqda xabar bermoqda «ТАСС».
Uch nafar O‘zbekiston fuqarosi mahalliy “Plov xaus elit” kafe tarmog‘iga oshpaz sifatida ishga olingan. Norilskda FSB ruxsatisiz muhojirlarning ishlashi taqiqlangani sababli, ularning yo‘li Krasnoyarsk orqali o‘tgan. U yerdan ozarbayjonlik fuqaro 600 ming rubl evaziga ularni barja orqali Norilskka olib borishni tashkil qilgan.
Tashkilotning to‘rt nafar xodimi (jumladan bosh direktor va ikki buxgalter) O‘zbekiston fuqarolari bilan soxta mehnat shartnomalarini tuzib, ularni yolg‘on ro‘yxatga qo‘ygan.
Prokuratura materiallari asosida Rossiya Federatsiyasida muhojirlarning noqonuniy bo‘lishini tashkil etish bo‘yicha jinoiy ish qo‘zg‘atildi. Sakkiz nafar gumonlanuvchi allaqachon qo‘lga olingan, boshqa ishtirokchilar aniqlanmoqda. Muhojirlarning o‘zlari esa ma’muriy javobgarlikka tortilib, Rossiya hududini tark etgan.
