Миграция қонунчилигини бузган муҳожирларда Россияда қолишини қонунийлаштириш учун бор-йўғи бир ой вақт қолди. Россия ИИВ маълум қилишича, 10 сентябрга қадар улар ҳуқуқий мақомини тартибга солиш ёки ихтиёрий равишда мамлакатдан чиқиб кетиш учун миграция хизматига мурожаат қилиши мумкин. Бу ҳақда xabar bermoqda «Объясняем.РФ».
Бу имконият назорат остидаги шахслар реестрига киритилган хорижликлар ва фуқаролиги бўлмаган шахсларга тааллуқли. Маслаҳат олиш учун улар яшаб турган ҳудуд бўйича Россия ИИВнинг «Паспорт-виза хизмати» ФДУПнинг исталган филиалига мурожаат қилиши лозим.
Россия ИИВ маълумотларига кўра, июн ойи ўрталарига келиб мамлакатда қолиш учун қонуний асосга эга бўлмаган 800 мингдан ортиқ шахс назорат остидаги шахслар реестрида қайд этилган. 10 сентябрдан сўнг улар эндиликда яшаш гувоҳномаси ёки бошқа йўл билан легал мақом олиш имкониятидан маҳрум бўлади.
Ушбу қоида Украина фуқароларига ҳам тааллуқли бўлиб, улар Украина ҳудудида доимий рўйхатда турган тақдирда Россияда яшаш гувоҳномаси ёки дарҳол фуқаролик олиш учун ҳужжат топшириш ҳуқуқига эга.
Россия ИИВси, шунингдек, муҳожирларни ишга жойлаштириш соҳасидаги қоидаларни бузганлик учун маъмурий жавобгарликка эслатди. Муҳожирларни ноқонуний равишда ишга жалб қилиш ёки меҳнат шартномаси тузилгани ёки бекор қилингани ҳақида хабар бермаслик учун жарималар мансабдор шахслар учун 50 минг рублгача, юридик шахслар учун эса 800 минг рублгача етиши мумкин.
Бундан ташқари, назоратдаги шахслар рўйхатидагиларга, жумладан таълим соҳасида хизматлар кўрсатиш ҳам маъмурий ҳуқуқбузарлик ҳисобланади. Бундай ҳолатлар учун жарималар жисмоний шахслар учун 2 мингдан 5 минг рублгача, ташкилотлар учун эса 400 мингдан 500 минг рублгача белгиланган.
