«Адолатли Россия — Ҳақиқат учун» партияси раиси Сергей Миронов Россия ҳудудида жиноят содир этган мигрантларга нисбатан чораларни қатъийлаштириш ташаббуси билан чиқди. Унга кўра, фақат қонунбузарларнинг ўзи эмас, балки уларнинг оилалари ҳам жавобгарликка тортилиши керак. Миронов бундай ҳолатларда уларни мамлакатдан депортация қилишни таклиф этди. Бу ҳақда xabar bermoqda » Газета.Ru».
«Биз мигрантнинг бутун оиласини депортация қилиш зарур, деган таклифни илгари сурмоқдамиз. Агар оила аъзоси қонунни бузган бўлса, у қонуннинг бутун қаттиқлиги билан жавоб бериши керак, бутун оила мамлакатдан чиқариб юборилиши шарт», — деди парламентарий, партия фракциясининг яқинлашиб келаётган кузги сессиядаги устувор йўналишлари ҳақидаги саволга жавоб бериб.
Мироновнинг фикрича, Россияга кириб келаётган барча хорижий фуқаролар учун мажбурий биометрик назорат жорий этилиши лозим. Унга кўра, ҳозирги кунда қонунбузар жиноят содир этиб, мамлакатни тарк этаётгани, кейинчалик исмини ўзгартириб, яна қайтиб келаётгани ҳолатлари тез-тез учрамоқда. Депутатнинг таъкидлашича, биометрик назоратни жорий этиш бундай вазиятларнинг олдини олишга ёрдам беради.
Мироновнинг ташаббуси мигрантлар орасида жиноятчиликнинг ўсиши фонисида янгради. 2025 йилнинг июль бошларида Россия Тергов қўмитаси маълум қилишича, йилнинг дастлабки беш ойида мигрантлар томонидан содир этилган жиноятлар сони 10% га ошган. Идора маълумотларига кўра, 2025 йил январидан июнигача хорижий фуқаролар томонидан 18 873 та жиноят содир этилган, қонунбузар мигрантлар сони эса 12,5 минг нафарни ташкил этган.
