Rossiya hukumati Rossiya Federatsiyasi va Tojikiston o'rtasidagi kelishuvga o'zgartirishlar kirituvchi protokollni ma'qulladi. Bu hujjat Rossiya hududida vaqtinchalik mehnat faoliyatini amalga oshirish uchun Tojikiston fuqarolarini uyushgan holda ishga yollashni tartibga soladi. Tegishli hujjat huquqiy axborotning rasmiy portalida e'lon qilindi.
Protokolga ko'ra, Rossiya Maorif vazirligi bo'lajak mehnat migrantlarini Rossiya o'rta professional ta'lim dasturlari va asosiy kasbiy ta'lim dasturlari bo'yicha ham Rossiyada, ham Tojikistonda tayyorlashga ko'maklashadi.
Rossiya Ichki ishlar vazirligi Rossiya Federatsiyasida ishlash istagida bo'lgan Tojikiston fuqarolarini daktiloskopik ro'yxatdan o'tkazish va suratga olish imkoniyatiga ularning o'z vatanida ega bo'ladi.
O'z navbatida, Tojikiston Ichki ishlar vazirligi nomzodlarni o'chirilmagan yoki olib tashlanmagan sudlanganlik holati, shuningdek, ularning xalqaro yoki davlatlararo qidiruvda ekanligini tekshirish majburiyatini oladi.
Bundan tashqari, kelajakdagi mehnat migrantlari alohida xalqaro shartnoma asosida Rossiya tibbiyot tashkilotlari tomonidan Tojikiston hududida tibbiy ko'rikdan o'tishlari mumkin.
Mart oyida Rossiya ichki ishlar vaziri Vladimir Kolokoltsev Rossiya Federatsiyasi va Tojikiston o'rtasida jinoyat sodir etgan noqonuniy migrantlar haqida ma'lumot almashish yo'lga qo'yilganini ta'kidladi. U noqonuniy migratsiyaga qarshi kurash ikki tomonlama munosabatlarda ustuvor mavzu ekanligini va uning oldini olishda samarali birgalikdagi sa'y-harakatlarni talab qilishini alohida qayd etdi.
