Россия Соғлиқни сақлаш вазирлиги муҳожирлар, фуқаролиги бўлмаган шахслар ва мамлакатда бошпана излаётганлар учун мажбурий тиббий кўрик доирасини кенгайтиришни режалаштирмоқда. Тағйиротлар лойиҳаларига кўра, 2026 йил 1 мартдан бошлаб муҳожирлар В ва С гепатитлари бор-йўқлиги бўйича текширилади. Бу ҳақда xabar bermoqda «Ведомости».
Ҳозирги кунда муҳожирлар наркотик моддалар, ОИВ (ВИЧ), сил, сифилис ва лепра бор-йўқлигини аниқлаш учун тестдан ўтишлари шарт. В ва С гепатитларини қўшимча равишда текшириш “меҳнат, вақтинчалик яшаш ёки яшаш гувоҳномасини олиш учун зарур бўлган тиббий гувоҳлантиришнинг ташкилий асосларини такомиллаштириш”ни мақсад қилган.
Бундан олдин Давлат думаси раиси ўринбосари Ирина Яровая С гепатитини текширишни жорий этиш таклифини илгари сурган эди. У буни мазкур касалликнинг “Россияга кириб келиш хавфи нуқтаи назаридан хавфли рақамий кўрсаткичи” билан изоҳлаган.
Қоидаларни бузганлик учун жарималар
Муҳожирларга қўйилаётган талабларни кучайтириш билан бирга, Соғлиқни сақлаш вазирлиги аввалроқ муҳожирларни тиббий гувоҳлантириш тартибини бузган шифокорлар ва тиббиёт муассасалари учун маъмурий жарималарни жорий этишни таклиф қилган. Жарималар қуйидагича бўлиши мумкин:
- Шифокор учун: 25 000 дан 50 000 рублгача.
- Клиника раҳбарияти учун: 50 000 дан 100 000 рублгача.
- Клиниканинг ўзи учун: 250 000 дан 800 000 рублгача ёки фаолиятни 90 суткага тўхтатиб туриш.
Россияга ишлаш мақсадида келган муҳожирлар кирган кундан эътиборан 30 кун ичида тиббий гувоҳлантирувдан ўтишлари шарт, бошқа мақсадларда келганлар эса 90 кун ичида буни амалга оширишлари лозим.
